უკრაინის ყველა ენერგოობიექტი აღდგენილია – დენის შმიგალი

„ენერგეტიკულ ინფრასტრუქტურაზე თავდასხმის შემდეგ, ჩვენ 14 ოქტომბრისთვის  მთელი ქვეყნის მასშტაბით ელექტროენერგიის მიწოდების სტაბილიზაცია მოვახდინეთ.

მომხმარებლებისთვის შეზღუდვების გრაფიკი აღარ გამოიყენება. ამჟამად მთელი ენერგოსისტემა გამართულად მუშაობს“, – განაცხადა უკრაინის პრემიერ-მინისტრმა.

მან ასევე განაცხადა, რომ მაგისტრალური ქსელების სიმძლავრე დაკლებულია მრავალრიცხოვანი დაზიანების გამო. მისი თქმით, მთავრობა 9,6 მლნ დოლარს გამოყოფს კიევის და სუმის ოლქებში ინფრასტრუქტურის ობიექტების აღსადგენად.

რუსეთის შეიარაღებულმა ძალებმა უკრაინის ინფრასტრუქტურულ ობიექტებზე სარაკეტო შეტევები 10,11 და 12 ოქტომბერს განახორციელეს. ასევე მათ კამიკაძე დრონები გამოიყენეს. ეს ყველაზე ფართომასშტაბიანი საჰაერო იერიში იყო უკრაინის წინააღმდეგ 24 თებერვალს დაწყებული სამხედრო აგრესიის შემდეგ 11 ოქტომბერს ორმა კამიკაძე დრონმა ვინიცის ოლქში ლადიჟინსკის თბოელექტროსადგური დააზიანეს. 12 ოქტომბერს კი რუსმა აგრესორებმა სუმის და დნეპროპეტროვსკის ოლქებში მდებარე ენერგეტიკული ობიექტები დაბომბეს.

უკრაინის თავდაცვის სამინისტროს ინფორმაციით, რუსულმა ძალებმა სხვადასხვა ტიპის 100-ზე მეტი რაკეტა გამოიყენეს, რომელთა უდიდესი ნაწილი უკრაინის ჰაერსაწინააღმდეგო ძალებმა ჩამოაგდეს. ასევე, განადგურებული იყო კამიკაძე დრონების უმეტესობაც.