ლარის გამყარებამ საწვავის გაიაფება გამოიწვია

ნავთობპროდუქტების იმპორტიორთა კავშირის ინფორმაციით, ბოლო დღეების განმავლობაში საქართველოს საცალო ქსელში რიგი კომპანიების მიერ სხვადასხვა ტიპის საწვავზე კვლავ გაგრძელდა ფასების შემცირება, რაც დაკავშირებულია საქართველოს ეროვნული ვალუტის – ლარის  გამყარებასთან დოლართან მიმართებაში.

“ეს იმის მიუხედავად ხდება, რომ გაზრდილია საერთაშორისო ფასები ნავთობპროდუქტებზე Platt’s-ის მიხედვით. (კერძოდ, ბოლო 1 თვის განმავლობაში ბენზინის საერთაშორისო ფასი გაზრდილია საშუალოდ 119 დოლარით/ტონაზე, ხოლო 10PPM დიზელის ფასი – საშუალოდ 66 დოლარით/ტონაზე),”, – განმარტავენ ასოციაციაში.

შედარებისათვის, წლის დასაწყისში ლარის ოფიციალური გაცვლითი კურსი დოლართან მიმართებაში შეადგენდა 2,3966 ერთეულს, ხოლო დღეისათვის –  2,2953 ერთეულს.

დღეისათვის  ბრენდირებულ გასამართ სადგურებზე 1 ლიტრი საწვავის საშუალოფასი შეადგენს: სუპერი ტიპის ბენზინი – 1,65-1,80 ლარი; პრემიუმი ტიპის ბენზინი -1,55-1,69 ლარი; რეგულარის ტიპის ბენზინი – 1,35-1,55 ლარი; დიზელი ლ-62 -1,32-1,45 ლარი; ევრო დიზელი – 1,35-1,65 ლარი.

ნავთობპროდუქტების იმპორტიორთა კავშირის განცხადებით: ბოლო პერიოდში ნავთობის ფასი იზრდება. დღეისათვის,  ლონდონში InterContinental Exchange Futures Europe-ზე (IСE Futures Europe) – Brent ტიპის ნავთობის ფასმა შეადგინა 41,47დოლარი/ბარელზე, ხოლო ნიუ-იორკში York Mercantile Exchange-ზე (NYMEX) – Light Sweet ტიპის ნავთობის ფასმა –  41,62  დოლარი/ბარელზე.

“ნავთობის ფასის მომავალი ტენდენცია მნიშვნელოვანწილად იქნება დამოკიდებული 17 აპრილს ყატარში დაგეგმილ ოპეკის შეხვედრაზე, სადაც განხილულ იქნება ნავთობის მოპოვების „გაყინვის“ საკითხი,“ – აცხადებენ ნავთობპროდუქტების იმპორტიორთა კავშირში.

წყარო: commersant.ge