რუსეთის მოქალაქეებს ევროკავშირში კრიპტოვალუტის ოპერაციები აეკრძალათ

რუსეთის წინააღმდეგ ევროკავშირის მიერ დაწესებული სანქციების მერვე პაკეტის მიხედვით, რუსეთის ფედერაციის მოქალაქეებს ევროკავშირის ტერიტორიაზე კრიპტოვალუტის „საფულეების“ გამოყენება აეკრძალათ. აქამდე მათ ამ საფულეებში 10 ათას ევრომდე თანხის დაგროვების უფლება ჰქონდათ. ამის შესახებ cnews.ru იუწყება.

„კრიპტოვალუტაზე აკრძალვა შეეხება ყველა ტიპის საფულეს, ელექტრონული ჩანაწერების და კრიპტოვალუტის შენახვის მომსახურებას თანხის რაოდენობის მიუხედავად“, – წერია ევროკომისიის მიერ მიღებულ გადაწყვეტილებაში.

კრიპტობირჟებზე ყველა ანგარიში, ასევე, სხვა კრიპტოსერვისები მიუწვდომელი იქნება ადამიანებისთვის, ვინც იქ რუსეთის ფედერაციის პასპორტით დარეგისტრირდა.

რუსეთიდან საგადამხდელო სისტემების, Visa და Mastercard წასვლის შემდეგ, ასევე, ბანკების ნაწილის SWIFT-ის სისტემიდან გათიშვის შემდეგ, კრიპტოვალუტის შეძენა რუსეთიდან საზღვარგარეთ ვალუტის გატანის ყველაზე პოპულარული საშუალება გახდა.

ყველაზე პოპულარული იყო სტეიბლქოინი USDT, სადაც Tether-ის ფასი აშშ-ის დოლარის კურსთან არის მიბმული.

წყარო: pia.ge