ნორვეგიული გაზის პოლონეთში ბალტიის მილსადენით მიწოდება რუსეთის ენერგორესურსების შემცირებით გამოწყვეულ ზეწოლას შეამსუბუქებს

პოლონეთის პრემიერ-მინისტრმა მატეუშ მორავიეცკიმ განაცხადა, რომ ნორვეგიიდან 5 მილიარდი კუბური მეტრი გაზის მოწოდებაზე კონტრაქტი უკვე გაფორმდა, მომავალი წლისთვის კი აღნიშნული მაჩვენებელი 10 მილიარდს შეადგენს.

პოლონეთში ბუნებრივი აირის შიდა წარმოება დაახლოებით 4 მილიარდ კუბურ მეტრს შეადგენს. თხევადი გაზის ტერმინალი შვინოიშჩეში ამჟამად მზადაა 6,5 მილიარდი კუბური მეტრი საწვავის მისაღებად, რაც უახლოეს მომავალში 8 მილიარდ კუბურ მეტრამდე გაიზრდება.

მორავიეცკის სიტყვებით, წელს ბუნებრივი აირის მოხმარება სავარაუდოდ შარშანდელთან შედარებით შემცირდება და 20 მილიარდ კუბურ მეტრზე დაბლა იქნება. შედეგად, გერმანიისგან, ავსტრიისგან, ჩეხეთისგან, ნიდერლანდებისგან და მრავალი სხვა ქვეყნისგან განსხვავებით, პოლონეთი არ იქნება მგრძნობიარე გაზის შანტაჟის მიმართ.

Baltic Pipe ბუნებრივ აირს ნორვეგიიდან დანიისა და პოლონეთის ბაზრებს ახალი ხაზით მიაწვდის. პროექტში ორი ინვესტორია ჩართული – დანიური Energinet და პოლონური Gaz-System. სადენი 2022 წლის 1 ოქტომბერს გაიხსნება და 2023 წლის დასაწყისისთვის სრულ დატვირთვას მიაღწევს.

მილსადენის წყალობით პოლონეთი მოელის მიწოდების დივერსიფიკაციისა და ქვეყნისა და რეგიონის ენერგეტიკული უსაფრთხოების გაუმჯობესებას. პროექტის მნიშვნელობა კიდევ უფრო გაზრდილია არსებული ვითარების გამო, როდესაც ევროპა ბუნებრივი აირის დეფიციტს განიცდის, რუსეთის მიერ უკრაინაში შეჭრით გამოწვეული პოლიტიკური შედეგების გამო.