EnergyNews EnergyNews.ge
ფოთის პორტის ოპერატორი კომპანია APM Terminals-ი პორტის გამოყენებით ბულგარეთისთვის რუსული თხევადი გაზის (LPG) შესაძლო მიწოდების შესახებ პირველ კომენტარს აკეთებს.
როგორც კომპანიაში „ბიზნეს ფორმულას“ განუცხადეს, მსგავსი ნებართვის მისაღებად არავის მიუმართავს.
„APM Terminals-ი, როგორც ევროკავშირში დაფუძნებული კომპანია, სრულ თანხვედრაშია ყველა შესაბამის სანქციასთან. ჩვენ არ ვახდენთ რუსული LPG-ის გადაზიდვებს და ჩვენთვის არავის მოუმართავს, რომ ნება დავრთოთ ფოთის გავლით LPG-ის გადაზიდვაზე“, – აცხადებენ APM Terminals-ში.
ამასთან, რუსეთის მიერ ბულგარეთისთვის LPG-ის მისაწოდებლად საქართველოს სარკინიგზო დერეფნის შესაძლო გამოყენებას არ ადასტურებენ „საქართველოს რკინიგზაში“. „ბიზნეს ფორმულას“ კომპანიაში განუცხადეს, რომ „მსგავსი გადაზიდვა დაგეგმილი არ აქვთ“.
შეგახსენებთ, Reuters-ის ინფორმაციით, რუსეთის LPG ექსპორტიორები ივლისიდან ფოთის პორტს ბულგარეთში თხევადი გაზის ექსპორტისთვის გამოიყენებენ. Reuters-ის ცნობით, მხოლოდ ივლისში რუსეთის ქალაქ სურგუტიდან, დაახლოებით 3 000 ტონა LPG, სარკინიგზო ტრანსპორტით ფოთში გადაიზიდება, შემდეგ კი საზღვაო ბორნით ბულგარეთის ქალაქ ვარნაში. Reuters-ი წერს, რომ რუსეთის LPG ექსპორტიორებს საქართველოს დერეფნის გამოყენება უკრაინაზე რკინიგზით გამავალი საექსპორტო მარშრუტების დახურვის გამო უწევთ. ტვირთის საქართველოში გადმომისამართება კი მათ ევროკავშირის ბაზრისთვის LPG-ის მიწოდებას დაახლოებით, 50%-ით უძვირებთ.
წყარო: businessformula.ge
