EnergyNews EnergyNews.ge
საქართველოს რკინიგზა თბილისში “გაზპრომის” წარწერიან ვაგონებთან დაკავშირებით, განცხადებას ავრცელებს და ტელეკომპანია “მთავარის” მიერ გავრცელებულ ინფორმაციას მცდარს უწოდებს.
ტექსტში ნათქვამია, რომ ეს არის ყაზახური კომპანიის ტვირთი (მაზუთი), რომელიც ჩატვირთულია საკუთარ ვაგონებში.
“საქართველოს რკინიგზა ტელეკომპანია მთავარზე გასულ გადაუმოწმებელ და მცდარ ინფორმაციას ეხმაურება.
კადრებში ნაჩვენები სატვირთო ვაგონები არ არის საქართველოს რკინიგზის საკუთრებაში არსებული სატვირთო ვაგონები. ეს არის ყაზახური კომპანიის ტვირთი (მაზუთი), რომელიც ჩატვირთულია საკუთარ ვაგონებში.
განმარტებისთვის ,,საკუთარი“ ვაგონი ნიშნავს რომელიმე კერძო კომპანიის საკუთრებაში რეგისტრირებულ ვაგონს. ხშირ შემთხვევაში, ასეთ ვაგონებს სწორედ ყაზახეთი იყენებს, რომელიც ტვირთს აგზავნის ევროპის მიმართულებით, საქართველო კი არის სატრანზიტო ქვეყანა. ტვირთი მიდის ბათუმის პორტში, საიდანაც გადაიტვირთება გემში და იგზავნება ევროპაში.
აქვე განმარტებისთვის, საქართველოს რკინიგზის მხრიდან რაიმე სახის სანქცირებული ტვირთის, მით უფრო სანქცირებული პირების კუთვნილი ტვირთის გატარება საქართველოს დერეფანში არ მომხდარა”, – ნათქვამია განცხადებაში.
ცნობისთვის, ტელეკომპანია “მთავარმა” დღეს გაავრცელა ინფორმაციას იმის შესახებ, რომ თბილისში სანქცირებული ნავთობი “გაზპრომის” წარწერიანი ვაგონებით გადაადგილდებოდა.
