“ოკუპანტების რაკეტებმა ზაპოროჟიეს ატომურ ელექტროსადგურს კრიტიკულ სიახლოვეს ჩაუარეს”

ზაპოროჟიეს ატომურ ელექტროსადგურში აცხადებენ, რომ რუსი ოკუპანტების მიერ დღეს გასროლილმა ორმა რაკეტამ სადგურს კრიტიკულად სახიფათო სიახლოვეს ჩაუარა.

ამის შესახებ ელექტროსადგურის პრესსამსახური იტყობინება.

“დაბალ სიმაღლეზე რაკეტების ფრენა, სადაც – დიდი რაოდენობით ბირთვული მასალებით – 7 ატომური დანადგარია განთავსებული, ქმნის უზარმაზარ რისკებს. რაკეტები ერთ-ერთ ბირთვულ დანადგარს რომ მოხვდეს, შეიქმნება  ბირთვული და რადიაციული კატასტროფა მთელი მსოფლიოსთვის“, – ნათქვამია ინფორმაციაში.

რუსმა ოკუპანტებმა ზაპოროჟიე გამთენიისას დაბომბეს. ზაპოროჟიეს საკრებულოში მოსახლეობას მოუწოდებენ, განგაშის დასრულებამდე დარჩნენ თავშესაფრებში და არ გაავრცელონ ფოტოები ან ვიდეოები სოციალურ ქსელებში.

რაც შეეხება ზაპოროჟიეს ატომურ ელექტროსადგურს – ოკუპანტებმა მასზე კონტროლი 4 მარტს დაამყარეს, სადაც მძიმე ტექნიკა და საბრძოლო მასალები განათავსეს და სადგური, ფაქტობრივად, სამხედრო ბაზად აქციეს.

11 მარტს ატომურ ელექტროსადგურზე რუსეთის ბირთვული კორპორაციის “როსატომის” 11 თანამშრომელი მივიდა.

“ენერგოატომ”-ის ინფორმაციით, დღესდღეობით, სადგურის 6-ვე ენერგობლოკს უკრაინული პერსონალი ემსახურება, მიმდინარეობს თანამშრომლების როტაცია. ფორმალურად, ოკუპანტები  ელექტროსადგურის მუშაობაში არ ერევიან, მაგრამ პერსონალი იძულებულია, ყველა ტექნიკურ გადაწყვეტილებასათან დაკავშირებით კოორდინაცია მათ მეთაურთან გაიაროს.