ელექტროენერგეტიკული ქსელის განვითარებაში 140 მილიონი დოლარი დაიხარჯება

საქართველოს სახელმწიფო ელექტროსისტემა მომდევნო სამი წლის განმავლობაში 140 მილიონ აშშ დოლარამდე ინვესტირებას გეგმავს.

როგორც  „საქართველოს სახელმწიფო ელექტროსისტემაში” (სსე) განაცხადეს, განსახორციელებელი ინვესტიციიდან ყველაზე დიდი წილი – $36 მილიონი მსოფლიო ბანკის სესხის ფარგლებში ელექტროგადამცემი ხაზის „ახალციხე-ბათუმის” განვითარებას მოხმარდება.

ქვესადგური „მარნეული 220″-ის მშენებლობა-განვითარებისთვის „სსე” აზიის განვითარების ბანკის დახმარებით $17.4 მილიონს და 4,3 მილიონ ლარს დახარჯავს.

ქვესადგური „ჯვარი 500-ისა” და „ხორგა 220-ისთვის” პროექტებზე მიემართება KfW-ს დაფინანსება 17.3 მილიონი და ADB-ს მიერ გამოყოფილი 11.9 მილიონი ევრო.

ქსანი – სტეფანწმინდის ელექტროგადამცემი ხაზების მშენებლობის პროექტისთვის, მომდევნო სამ წელში KfW-ს გამოყოფილი 21.6 მილიონ ევრო დაიხარჯება.  

ქვესადგური „ქსანი 500″-ის რეაბილიტაციისთვის ADB-ის სესხის ფარგლებში 9.9 მილიონი ევრო, ხოლო დამატებით 5 ქვესადგურის მართვისა და დაცვის პროექტისთვის, USAID-ის გრანტის ფარგლებში 3.9 მილიონი აშშ დოლარი იქნება მიმართული.

ასევე,  EBRD-ის 13 მილიონიანი ევროს სესხის ფარგლებში, სსე „ოდიში 1, 2″-ის ელექტროგადამცემ ხაზებს ააშენებს.

აღსანიშნავია, რომ აღნიშნული სამ წლიანი საინვესტიციო გეგმის შეთანხმება ამ ეტაპზე საქართველოს ენერგეტიკის სამინისტროსა და სემეკთან მიმდინარეობს.