EnergyNews EnergyNews.ge
მიმდინარე წელს ნავთობის ფასის ზრდის შემთხვევაში რუსეთის ბიუჯეტი სულ მცირე $65 მილიარდზე მეტ დამატებით შემოსავალს მიიღებს. ნავთობი ქვეყნის მთავარი საექსპორტო პროდუქტია და კრემლს ფინანსურ სიძლიერეს მატებს მაშინ, როცა რუსეთს შეერთებული შტატებისა და ევროპის მკაცრი სანქციები ემუქრება.
ეკონომისტების შეფასებით, წელს ფასები ბარელზე $90-ის ნიშნულზე შენარჩუნდება, რაც მნიშვნელოვნად გაზრდის შემოსავლებს. თუ ბარელი ნავთობის ფასი $100-ს მიაღწევს, შემოსავალი $73 მილიარდს მიუახლოვდება.
რუბლის კურსის თვალსაზრისით, მოულოდნელი მოგება შეიძლება კიდევ უფრო დიდი იყოს, რადგან რუსული რუბლი დოლართან მიმართებაში უკრაინის კრიზისის გამო ახალი სანქციების შიშის ფონზე შესუსტდა. ბუნებრივი აირის უფრო მაღალმა ფასებმა ევროპაში, რუსეთის მთავარ საექსპორტო ბაზარზე, მუდმივი დაძაბულობის გამო, შეიძლება კიდევ უფრო გაზარდოს მოულოდნელი შემოსავლები.
“რუსეთის ფისკალური პოზიცია იმდენად სუპერ სტაბილურია, რომ ნავთობის უფრო მოკრძალებული ფასებითაც კი, რთულია მისი კომპრომისზე წასვლა ამჟამინდელ სიტუაციაში”,- ამბობს სოფია დონეცი, Renaissance Capital-ის ეკონომისტი მოსკოვში.
ეკონომისტ სკოტ ჯონსონის შეფასებით, “წლევანდელი ენერგეტიკული შემოსავლები, როგორც ჩანს, საოცრად დიდი იქნება. ეს ზრდის რუსეთის ფისკალურ რეზერვებს კრემლისთვის შესაფერის დროს, რაც უფრო დიდ ბუფერს ქმნის კრიზისის წინააღმდეგ სანქციების დაწესების შემთხვევაში. გეოპოლიტიკის გარდა, ეს ასევე ნიშნავს მეტ მოქნილობას ხარჯების გასაზრდელად და ეკონომიკაში ინვესტიციებისთვის”.
ბოლო რამდენიმე კვირის განმავლობაში რუსეთის მთავარი საექსპორტო პროდუქტის ფასებმა მიაღწია იმ დონეს, რომელიც ბოლოს 2014 წელს დაფიქსირდა, როდესაც შეერთებულმა შტატებმა და მისმა მოკავშირეებმა პირველად დააწესეს ფართო ეკონომიკური სანქციები მოსკოვის წინააღმდეგ ყირიმის ანექსიისთვის. ახლა დასავლეთი იმუქრება ახალი შეზღუდვების დაწესებით, თუ რუსეთი შეიჭრება უკრაინაში.
კანონის თანახმად, გაუთვალისწინებელი შემოსავალი ეროვნულ კეთილდღეობის ფონდს გადაეცემა, რომლის უმეტესი ნაწილი ოქროსა და უცხოურ ვალუტაში ინახება ცენტრალური ბანკის მიერ, როგორც მისი რეზერვების ნაწილი. ფულის ნაწილი შეიძლება გამოყენებულ იქნას ინფრასტრუქტურისა და საინვესტიციო პროექტებისთვის. მთავრობა ამჟამად გეგმავს ფონდიდან დაახლოებით 2,5 ტრილიონი რუბლის დახარჯვას მსგავს პროექტებზე მომდევნო რამდენიმე წლის განმავლობაში.
“ნავთობის მაღალი ფასი, უპირველეს ყოვლისა, ნიშნავს ინტენსიურ ლაპარაკს ეროვნული კეთილდღეობის ფონდის ხარჯვაზე, ეს არის აირბაგი“,- თქვა დონეცმა. მისი თქმით, ბარელი ნავთობის ფასის $85-ის შემთხვევაშიც კი, ფონდის ბალანსი წელს 50%-ით გაიზრდება.
დასავლეთის სანქციების პირველი ტალღის შემდეგ, რუსეთმა გადადგა ნაბიჯები ნავთობისა და გაზის შემოსავლებზე დამოკიდებულების შესამცირებლად. წლევანდელი ბიუჯეტი მიზნად ისახავს ამ წყაროებიდან მიღებული შემოსავლების 38%-ს, რაც ათი წლის წინ 50%-ზე მეტი იყო.
წყარო: “ბიზნესფორმულა”
