„რიონის ხეობის მცველებმა” ბენზინმზიდი არ გაატარეს

სოფელ გუმათში აღმართულ რკინის ჯებირთან მყოფმა ნამახვანჰესის მშენებლობის მოწინააღმდეგეებმა არ გაატარეს ბენზინმზიდი. როგორც რადიო თავისუფლების კორესპონდენტი იუწყება, იყო სიტყვიერი დაპირისპირებაც.

ანალოგიურად მოიქცნენ ქუთაისში, მწვანეყვავილას უბანში შეკრებილი „რიონის ხეობის მცველები”. ისინი ეჭვობენ, რომ ბენზინმზიდი ეკუთვნის კომპანია „ენკას“. მძღოლი და მისი თანმხლები კაცი კი ამტკიცებენ, რომ სატვირთო ეკუთვნის კერძო ავტოგასამართ სადგურს.

მწვანეყვავილას უბანში აქტივისტებს გაშლილი აქვთ კარავი, სადაც გადის რიონის ხეობაში მიმავალი შემოვლითი გზები. აქტივისტები ცდილობენ, კომპანიის ავტომანქანები არც ამ მიმართულებიდან გაატარონ.

ბოლო რამდენიმე ღამის განმავლობაში გუმათჰესთან აღმართულ რკინის ჯებირზე პროტესტის ნიშნად აბრახუნებდნენ მოძრაობის „რიონის ხეობის გადარჩენისთვის“ აქტივისტები და სხვადასხვა რეგიონიდან ჩასული მათი მხარდამჭერები. გარდა ამისა, აქციის მონაწილეები რამდენიმე საავტომობილო გზას მეთვალყურეობენ და არ ატარებენ კომპანია „ენკას” ავტომანქანებს.