“ღრმად ვარ დარწმუნებული, ამ კონკრეტული ჰესის საჭიროებაში”

რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, სოზარ სუბარმა „ნამახვანჰესის“ მშენებლობის მოწინააღმდეგეთა აქციის ორგანიზატორებთან შეხვედრის შემდეგ ჟურნალისტებთან ისაუბრა.

„ვისაუბრეთ ყველა საკითხზე, რა თქმა უნდა ყველაფერზე, პასუხი დღეს ვერ გვექნებოდა, თუმცა შევთანხმდით დიალოგის გაგრძელებაზე. ეს არის ყველაზე მნიშვნელოვანი. შვიდი ადამიანი ვიყავით პარლამენტიდან, იყო პრემიერის წარმომადგენელი. იცით, რომ პარლამენტში მრავალსაათიანი განხილვა იყო, შედგა რამდენიმე შეხვედრა და პარლამენტარების მხრიდან ეს იყო სწორედ იმ შეხვედრების გაგრძელება. მე მგონი, მთლიანობაში იყო ძალიან კონსტრუქციული.

მართალია, თქვენთან ინტერვიუში ერთ-ერთმა წარმომადგენელმა წითელი ხაზი მაინც ახსენა, მაგრამ შევთანხმდით, რომ წითელი ხაზების გარეშე ვლაპარაკობთ. ჩვენ ვთქვით რომ ხელისუფლებაში, პირადად მეც ამ პოზიციაზე ვარ, ღრმად ვარ დარწმუნებული, ამ კონკრეტული ჰესის საჭიროებაში ქვეყნისთვის, ისივე როგორც მეორე მხარესაც იყვნენ ადამიანები, რომლებიც ღრმად არიან დარწმუნებული, რომ ეს ჰესი არავითარ შემთხვევაში არ უნდა აშენდეს.

დიალოგის დროს ასეთ კატეგორიებს გამოვრიცხავთ, არ უნდა აშენდეს ან აუცილებლად უნდა აშენდეს, ამითი დიალოგს არ ვიწყებთ. მისაღები ვარიანტი ჩემთვის არის, რომ უნდა აშენდეს, რადგან ეს სჭირდება ქვეყანას, მათთვის არის ეს არ უნდა აშენდეს, მაგრამ დიალოგის ამით დაწყება არის შეუძლებელი. ვამბობთ, რომ დიალოგის დროს ყველა კითხვას, რაც არსებობს, პუნქტ პუნქტად ჩავივლით, პუნქტიდან პუნქტამდე გავცემთ პასუხს და შესაბამისად, ან ისინი დარწმუნდებიან ამის საჭიროებაში, ან ჩვენ დავრწმუნდებით საპირისპიროში“, – განაცხადა სოზარ სუბარმა.

ინფორმაციისთვის საქართველოს პრემიერ-მინისტრ ირაკლი ღარიბაშვილის დავალებით, ქუთაისში მოლაპარაკებებზე იმყოფებოდნენ მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი, სახელმწიფო რწმუნებულები იმერეთისა და რაჭა-ლეჩხუმ ქვემო სვანეთის მხარეში, ზვიად შალამბერიძე და პარმენ მარგველიძე.

მათთან ერთად იყო იმერეთის რეგიონში სახელმწიფო რწმუნებულის ადმინისტრაციაში პარლამენტის რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარი, სამტრედიის, წყალტუბოს, ხონის და ვანის მაჟორიტარი დეპუტატი გივი ჭიჭინაძე, ქუთაისის მაჟორიტარი დეპუტატი ზაზა ლომინაძე, ზესტაფონის, ბაღდათის, თერჯოლისა და ტყიბულის მაჟორიტარი დეპუტატი ბეჟან წაქაძე, ამბროლაურის, ონის, ცაგერის, ლენტეხისა და მესტიის მაჟორიტარი დეპუტატი გოჩა ენუქიძე, უმრავლესობის წევრები დიმიტრი სამხარაძე და გოდერძი ჩანქსელიანი.