ნათია თურნავა და ლევან დავითაშვილი „ნამახვანჰესის“ პროექტთან დაკავშირებით ექსპერტებს ხვდებიან

ეკონომიკისა და მდგრადი განვითარების სამინისტროს ორგანიზებით, „ნამახვანჰესის“ პროექტთან დაკავშირებით, ამ წუთებში სამუშაო შეხვედრა იმართება.

შეხვედრას ეკონომიკისა და გარემოსდაცვის მინისტრები მართავენ. შეხვედრაზე იმყოფებიან ენერგეტიკოსები, ეკოლოგები, ჰიდროლოგები და გეოლოგები.

„საზოგადოების ჩართულობის გარეშე ასეთი დიდი პროექტის განხორცილება რთულია. სწორი სამეცნიერო აზრი მნიშვნელოვანია. კომპანიასთან შევთანხმდით, რომ კვლევის დასრულებამდე კაშხალი არ აშენდება. ამიტომ, დაინტერესებულ ექსპერტებს ამ პროცესში ჩართვის საშუალება ექნებათ. აპრილის თვე გამოვიყენოთ იმისთვის, რომ კვლევას გაეცნოთ“, – განაცხადა ნათია თურნავამ.

მინისტრმა ექსპერტებს მიმართა, წარმოადგინონ, სად ხედავენ რისკებს და აპრილის ბოლოს მსგავს ფორმატში ისევ შეიკრიბონ.

„ვისაუბროთ, თუ სად დაინახეთ რისკები. საშუალება გექნებათ, მშენებლობის ზედამხედველობის პროცესშიც ჩაერთოთ“, – აღნიშნა ნათია თურნავამ.