ენერგეტიკის მინისტრი კახა კალაძე არ გამორიცხავს, რომ ელექტროენერგიაზე ტარიფის მატება მოხდეს, შესაძლოა, ეს გარდაუვალი იყოს, თუმცა აცხადებს, რომ ამაზე მთავრობა იმსჯელებს
ენერგეტიკის მინისტრმა კახი კალაძემ გადაცემა “განსხვავებული აქცენტების” წამყვანის კითხვაზე, პრემიერ-მინისტრის მთავრობის სხდომაზე ელექტროენერგიის ტარიფთან დაკავშირებით გაკეთებულ განცხადებაზე ისაუბრა.
“პირველ რიგში ენერგეტიკის სამინისტრო მინდა გავმიჯნო მარეგულირებელი კომისიისგან. არანაირი კავშირი არ აქვს ტარიფების გადახედვას და მასზე მუშაობას ენერგეტიკის სამინისტროსთან. რაც შეეხება აჟიოტაჟს, ვფიქრობ, ეს მიზანიმართულად იყო შექმნილი, განსაკუთრებით ტელევიზიების მხრიდან ტარიფის გაძვირებასთან დაკავშირებით. მიზანმიმართულად შექმნილი აჟიოტაჟი იმიტომ იყო, რომ ჯერ შესწავლა დაიწყო მარეგულირებელმა კომისიამ და გარკვეულმა ტელეკომპანიებმა უკვე დაიწყეს საუბარი იმაზე, რომ მოსახლეობას ტარიფი გაუძვირდებოდა”, – განაცხადა ვიცე-პრემიერმა.
წამყვანის კითხვაზე, პრემიერის განცხადების შემდეგ რატომ დახურა ენერგეტიკის მარეგულირებელმა კომისიამ კვლევის საჯაროობა და ხომ არ არის ეს გამოწვეული პრემიერის გაფრთხილებით, კალაძემ განაცხადა, რომ კვლევა კვლავ საჯაროა.
“ის, რაზეც თქვენ საუბრობთ, რომ კომისიის საქმიანობა დახურულია, მინდა, გითხრათ, რომ არცერთ კომპანიასთან მიმართებაში არაა კომისიის საქმიანობა გასაიდუმლოებული. სხვათაშორის, დღეს დავინტერესდი ზუსტად კომისიის მუშაობით “ჯორჯიან უოთერ ენდ ფაუერის” თემით და მინდა გითხრათ, რომ საჯაროობა დაცულია. ვერაფრით დაგეთანხმებით მარეგულირებელ კომისიაზე პრემიერის ზეწოლაზე. მარეგულირებელი კომისია სრულიად დამოუკიდებელია და ისინი ამ მიმართულებით მუშაობენ და 10 სექტემბრამდე კვლევის შედეგებს წარმოადგენენ”, – განაცხადა კალაძემ.
მისი თქმით, ის არის ამ დარგში მიმდინარე მოვლენებზე პასუხისმგებელი. “რა თქმა უნდა, ლარის გაუფასურებამ დიდი დარტყმა მიაყენა ენერგეტიკულ კომპანიებს. განსაკუთრებით დიდი პრობლემები შეიქმნა თბოელექტროსადგურებისათვის.
ისინი ძირითადად იმპორტირებულ აირზე მუშაობენ, რომელიც ძირითადად აზერბაიჯანიდან და რუსეთიდან შემოდის. ყიდვა ხდება დოლარში და შემდეგ ჩვენი მოსახლეობა საფასურს ლარში იხდის, რამაც გარკვეული პრობლემები შეუქმნა ამ კომპანიებს. ზუსტად ამის გამო მიმართეს მათ მარეგულირებელ კომპანიას, რომ ტარიფის გადათვლა მომხდარიყო. არ გამოვრიცხავ, რომ ელექტროენერგიაზე ტარიფის მატება მოხდეს, შესაძლოა, ეს გარდაუვალი იყოს, თუმცა ამაზე მთავრობა იმსჯელებს და მხოლოდ ჩემი გადასაწყვეტი არ იქნება, მიზნობრივი სუფსიდირება შესაძლოა, მოხდეს ამ თემაზე”, – განაცხადა ენერგეტიკის მინისტრმა.
შეგახსენებთ, რომ რამდენიმე დღის წინ ელექსტროენერგიის ტარიფის შესაძლო მატებას საქართველოს პრემიერ-მინისტრი, ირაკლი ღარიბაშვილი გამოეხმაურა. მან ენერგეტიკის სამინისტროს, „ენერგო-პრო ჯორჯიასა“ და მარეგულირებელ კომისიას მოუწოდა, შიდა საუბრები საჯარო აღარ გახადონ, ვინაიდან მოსახლეობას ძაბავს.
„მინდა, მოსახლეობას ვუთხრა, რომ ამ ეტაპზე არ იგეგმება ელექტროენერგიის ფასის მომატება. ძალიან გთხოვთ ყველას – „ენერგო-პროს“ წარმომადგენლებს, ენერგეტიკის სამინისტროს და მარეგულირებელ კომისიას, რომ თქვენი შიდა საუბრები არ გახდეს საჯარო. თქვენ შიგნით ისაუბრეთ, იმსჯელეთ ამა თუ იმ კომპანიის მომართვებზე, მაგრამ ეს არ უნდა იყოს საჯარო და მოსახლეობას ნუ ძაბავთ, როცა ამ ეტაპზე არ იგეგმება არავითარი ფასის მატება“, – აღნიშნა მთავრობის სხდომაზე პრემიერ-მინისტრმა.
About the Author
